Xwedayê Teâla li nefsa xwe zulum heram kiriye. Di ayetên xwe de li zaliman le'net barandiye. Ez dixwazim bi vê xebatê bidim nîşandan ku piştî qiyam û daleqandina Şêx Se'îd neyartîya cimhûrîyetê li hember milletê me zêde ğeddar û berfireh bûye. Belê Şêx Se'îd û 46 hevalên xwe 'âlim û munewwerên Kurda li wîlayeta Dîyarbekirê li Derîyê Çîye hatin xeniqandin. Piştî daleqandina wan kesên ku milletê me li hember leşkera biparêzin neman. Bi ser herêma me da kîn û ğezeba leşkeran barîya û barîya. Gund bi gundê me şewitandin û însanê bêrî zarok û pîrek qetil kirin.

Însanê me qetil kirin lê belê bi qetilkirineke ku di tarîxa însanîyetê de kêm hatiye dîtin. Belkî di paşerojê de di hedîsa Eshabul Ûxdûd de hatibû dîtin. Dayik û sebîyên di himêza dê de bi tevî hev davêtin newala êgir. Êgir pêl bi ser pêlê ve diqelavt û ew dişewitandin. Di tarîxa me ya nêz û bi kul û birîn da jî hedîsa Eshabul Ûxdûd nû bû hate ber çava. Di kadîna kayê de zarok û pîrek şewitandin.