Jêhat gama ke zor-çiqîyame karyola ser ra werişt û destê xo berd panjurê pacaya odaya xo dî ke hema-hema peroj o. Qiseykerdişê telefonî ra pey se bibi ey? Nêzanayêne ê çar-panc saetan de ey se kerdo destê xo leşa xo ra çarna ney qet çîyekî çin bi. Ey alkol zî nêşimitbi ke vajo ez blackout bîyo mezgê mi nêşîyayo çîyanê neweyan qeyd biko. Nê çar-panc saetan de se kerdbi? O xo ra ewnîya hema zî pîjemeyî pira bîy çîmê xo derûdor ra çarnay. Zereyê oda sey xo bi. Etajer cayê xo de kitabo ke ey şewa bîne wendbi cayê xo de bi. Qedeha awe masa ser o û berê oda sey hertimî akerde bi. Fotografê Sara dêsî ra... Berzînê ey ra cor dêsî ra yew kopyaya tabloyê Picassoyî "Çime"yî zî cayê xo de bi. Cila ey hema zî germine bî.